今年五月不会穷

　　大家经常话，五穷六绝七翻身，其实冇乜科学根据，但又很奇怪，五月，六月消费意欲又唔系几好，本来五月都唔应该太差，因国内有五一劳动节长假，而香港只得一日假期，北上消费的人一定唔够国内嚟香港的人咁多，但过去几年受疫情影响，五一假期都冇人嚟，想唔穷都唔得。

　　今年五一假期又唔同，有大量内地旅客，令到有部份港人可能冇得放假，因为要加班接待内地旅客，大家唔好以为只得做零售或者保险行业的人才冇得放假，今年在银行工作的人，亦有不少要取消休假，因为有很多内地人乘五一假期之便嚟香港开户口，以后可以每次带二万人民币来港，用剩咗可以存入户口，集腋成裘之后，可以买股票，去外国旅行，甚至买楼都得，估计在五一假期有80万内地旅客，至少有一半会开户口，有人质疑会唔会有咁多，因利乘便而已，开个户口好似搞自动过关一样，方便自己，有时间点解唔开户口。

　　在五一假期之前，恒指连升1500点，已经唔知几耐未试过，跌1500点就经常发生，理由很简单，香港人知道有咁多内地人来港开户口，当中或多或少都会有人买股票，恒指早已跌无可跌，一定会藉此反弹，香港人唔会咁执输，点会唔买股票。

　　地产商亦磨权擦掌，我唔敢讲磨刀霍霍，在五一假期有不少新楼盘推出，亦有少新楼货尾单位，内地人想买楼的话，一定唔会失望，有内地老友同我讲，他们唔担心买香港新楼，因为从不烂尾，原来唔烂尾都是一个卖点，地产商千祈唔好破坏自己商誉。

　　我有好多内地老友来港，要安排食晚饭，本来家宴是最好，可以饮到乱晒笼，但厨师早已约满，高级食肆以及会所亦爆棚，唯有用菲藉家务助理，新加坡人叫菲劳，咁嘅情况下，大家都搵到钱，股市又升新楼又超额认购，我够胆讲，今年五月不会穷。